Ля метро “Грушаўка” вясковую хатку пакінулі проста пасярод будаўнічай пляцоўкі

Ля метро “Грушаўка” вясковую хатку пакінулі проста пасярод будаўнічай пляцоўкі

Пасярод вялікай будаўнічай пляцоўкі каля станцыі метро “Грушаўка” слухачы Еўрарадыё заўважылі вясковую хатку. Усе прыватныя дамы навокал ужо знесеныя, а яна самотна стаіць на пустцы, дзе неўзабаве пачнуць капаць катлаван пад шматкватэрныя хмарачосы. 

Нам стала цікава, што за гісторыя звязаная з гэтым домам. Няўжо ён так і застанецца на сваім месцы, калі навокал паўстануць жылыя вышынныя дамы?

Ля метро “Грушаўка” вясковую хатку пакінулі проста пасярод будаўнічай пляцоўкі
Будаўнічая пляцоўка / Еўрарадыё

Гаворка ідзе пра дом №33 па 2-й вуліцы Шчорса. Побач Еўрарадыё знайшло яшчэ адзін аскепак ранейшай забудовы — прыстойны катэдж з белай цэглы. Гэта дом №11 па вуліцы Чырванадонскай. У ім ужо выбітыя вокны, таму з яго лёсам усё больш-менш зразумела. А што з вясковай хаткай з гаражом?

Ля метро “Грушаўка” вясковую хатку пакінулі проста пасярод будаўнічай пляцоўкі
Дом №11 па вуліцы Чырвонадонскай / Еўрарадыё

Права будаваць жыллё на гэтай тэрыторыі ў красавіку 2019 года набыла кампанія “Гранд Хаус Інжынірынг”. З участкам былі значныя цяжкасці, звязаныя з адсяленнем жыхароў прыватнага сектара, расказвалі Еўрарадыё ў кампаніі. Але цяпер будоўлі больш нічога не замінае.

— Мы выйгралі суд ва ўласнікаў гэтых двух дамоў. Паводле рашэння суда, неўзабаве ўласнікі мусяць забраць свае рэчы і пакінуць жыллё, — запэўнілі Еўрарадыё ў “Гранд Хаус Інжынірынг”. — Наколькі нам вядома, транспарт для перавозкі яшчэ не заказвалі. Але высяленне колішніх жыхароў павінна адбыцца ў найбліжэйшы час.

Дом №33 па 2-й вуліцы Шчорса належаў у розных долях некалькім гаспадарам. Мы задаволілі маёмасныя правы ўсіх уладальнікаў доляў, даўшы ім жыллё ў Маскоўскім раёне. Дом №11 па вуліцы Чырванадонскай гаспадары здавалі ў доўгатэрміновую арэнду. Мы выплацілі ўласнікам грашовую кампенсацыю.

Ля метро “Грушаўка” вясковую хатку пакінулі проста пасярод будаўнічай пляцоўкі
Дом №11 па вуліцы Чырвонадонскай / Еўрарадыё

У Еўрарадыё пакуль не атрымалася скантактавацца з жыхарамі катэджаў, пакінутых на будпляцоўцы, каб выслухаць іх версію падзей. Мы прапануем гаспадарам або іх суседзям звязацца з рэдакцыяй Еўрарадыё.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі