Лукашэнка заявіў, што "ўжо больш за месяц у гэтых багаценькіх найперш кварталах... вывешвалі бел-чырвона-белыя сцягі і стужкі... нават трасы нацягвалі ад дома да дома... вывешвалі... як у нас прынята лічыць, калабаранцкія фашысцкія сцягі". Далей ён расказваў розныя жахі пра гэтыя сцягі і вайну, але не згадаў, што сам даваў прысягу ў якасці прэзідэнта пад бел-чырвона-белым сцягам.
"У гэтых дварах адны вывешвалі гэтыя сцягі і гэтыя стужкі, а другія хадзілі і зразалі..., — цытуе словы Аляксандра Лукашэнкі БЕЛТА. — Мы апошнім часам стварылі дружыны. Іх здаецца каля 500 у Мінску толькі, і яны таксама хадзілі і зразалі гэтыя сцягі".
Лукашэнка паведаміў, што і на "Плошчу Перамен" прыехалі гэтыя дружыннікі, каб "зрэзаць сцягі". А мясцовыя жыхары "выскачылі з дамоў", адбыліся сутычкі. "Але ў даным выпадку, як мне далажылі, распачалася бойка, прычым бойка сур'ёзная", — кажа ён. І сцвярджае, што міліцыю выклікалі праціўнікі дружыннікаў. Але калі прыехаў узмоцнены нарад, "усе разбегліся".
"А гэты [Раман Бандарэнка] ці то траўміраваны быў, ці то што... у нецвярозым стане, — расказваў Лукашэнка. — Гэта прызнана. Заключэнне сёння прадставіў Следчы камітэт. Яны выклалі гэта ўсё. Ён быў пʼяны".
Па словах Лукашэнкі, мужчыну "ўзялі і павезлі ў гэты аддзел", але яму "стала кепска па дарозе, як мне далажылі". "Яны выклікалі хуткую дапамогу і адправілі яго ў шпіталь", — заявіў Лукашэнка. "Вось як было на самой справе", — дадаў ён.
"А што, уладзе трэба было гэта? — гаварыў Аляксандр Лукашэнка. — Ды не, нам гэта не трэба. Нам ужо гэта ўсё надакучыла".
Далей ён гаварыў пра "сакральную ахвяру", якой раней нібыта хацелі зрабіць Святлану Ціханоўскую. "Вось яны цяпер рванулі на гэтага хлопца", — заявіў Лукашэнка. Ён згадаў, што ў збіцці Бандарэнкі ўжо сталі абвінавачваць людзей, блізкіх да яго. "Яны ўжо прызначылі вінаватых", — абурыўся Аляксандр Лукашэнка. І дадаў, што папрасіў прадстаўнікоў МУС ("паколькі спрабуюць стрэлкі перавесці зноў на гэтых "карнікаў") звязацца з бацькамі Рамана Бандарэнкі і "размаўляць з гэтымі бацькамі, як бы ні было цяжка".
