Краўчук не выключыў, што Украіна выйдзе з мінскага фармату перамоваў
Украіна можа адмовіцца ад мінскага фармату перамоваў наконт Данбасу, калі вырашыць, што ён не даё плёну Пра гэта заявіў кіраўнік украінскай дэлегацыі экс-прэзідэнт Леанід Краўчук.
"Але калі мы ўбачым, што гэта ці спроба неяк адысці ад галоўнага пытання пра мір на Данбасе або спроба схаваць свае сапраўдныя намеры, я буду падтрымліваць, не толькі падтрымліваць, а сам буду прасіць — выходзіць з мінскага фармату, таму што ўсё ўжо было зроблена, каб яго рэанімаваць, але, на жаль, не атрымалася. Значыць, трэба шукаць іншыя фарматы", — перадае ТАСС словы Краўчука.
На думку афіцыйнага Кіева, змена фармату можа азначаць змену ў складзе бакоў і павышэнне статусу ўдзельнікаў. Краўчук не выключае, што фармат перамоваў можа быць пашыраны, калі іх перанясуць у адну з еўрапейскіх краін. Альбо ў перамовах могуць быць задзейнічаныя больш высокапастаўленыя асобы, каб рашэнні цалкам адпавядалі нормам міжнароднага права і былі абавязковымі для выканання.
Са сваёй пазіцыяй Украіна, па словах Краўчука вызначыцца пасля магчымых сустрэч паміж прэзідэнтам ЗША Джо Байдэнам і прэзідэнтам Расіі Уладзімірам Пуціным, а таксама паміж Пуціным і ўкраінскім прэзідэнтам Уладзімірам Зяленскім.
Раней Краўчук назваў Аляксандра Лукашэнку васалам Пуціна і заявіў пра неабходнасць перанесці перамовы з Беларусі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
