Колішні журналіст Еўрарадыё Раман Пратасевіч папрасіў прытулку ў Польшчы

Колішні журналіст Еўрарадыё Раман Пратасевіч папрасіў прытулку (міжнароднай аховы) у Польшчы. Дакументы ў Офіс па справах замежнікаў ён падаў 22 студзеня.

Пратасевіч кажа, што адчуваў ціск з боку спецслужбаў пасля таго, як быў затрыманы яго сябар Уладзімір Чудзянцоў. З 21 лістапада — пасля затрымання ў цягніку па дарозе ў Варшаву — Чудзянцоў знаходзіцца ў брэсцкім СІЗА. Нядаўна ў дадатак да справы за наркотыкі, нібыта знойдзеныя ў яго багажы, на яго пачалі справу за сексуальны гвалт супраць непаўналетняга.

"Чаму я з'ехаў? — кажа Пратасевіч у каментары Еўрарадыё. — Гэта цалкам звязана з тым, што адбываецца ў справе Чудзянцова. Я быў першым чалавекам, які даведаўся пра ягонае затрыманне. Я быў першым чалавекам, які раздзьмуваў інфармацыйную хвалю... Я таксама актыўна выступаў і ў сацсетках, я актыўна інфармаваў грамадства пра ход гэтай справы. Вядома, мая персона не магла застацца без увагі з боку праваахоўных органаў...".

Пратасевіч мяркуе, што ў Беларусі яго мабільны тэлефон праслухоўваўся, а за ім пачалі сачыць невядомыя асобы.

"Я разумеў, што хутчэй за ўсё зараз проста чагосьці чакаюць, а потым я таксама маю ўсе шанцы аказацца за кратамі", — распавёў журналіст.

Напачатку 2010-х Раман Пратасевіч быў моладзевым актывістам. Яго неаднаразова затрымлівалі — у тым ліку падчас "маўклівых пратэстаў" 2011 года. Хлопец паступіў на факультэт журналістыкі БДУ, аднак неўзабаве быў адлічаны.

Колішні журналіст Еўрарадыё Раман Пратасевіч папрасіў прытулку ў Польшчы

Затрыманне Рамана Пратасевіча ўлетку 2011 года / Еўрарадыё

Пратасевіч паспеў папрацаваць у некалькіх незалежных выданнях. Апошнім з іх было Еўрарадыё, ён працаваў у нас з верасня 2018 года па лістапад 2019-га — амаль да самага ад'езда ў Польшчу ў звязку са "справай Чудзянцова".

Вось што кажа Раман Пратасевіч у каментары Еўрарадыё: "Што я буду рабіць у Польшчы? Жыццё працягваецца. Я застануся ў журналістыцы... Спадзяюся, што ўсё і далей будзе добра".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.