Кіраўнік МЗС Брытаніі вінаваціць Мінск у жорсткім абыходжанні з Пратасевічам
Кіраўнік МЗС Вялікабрытаніі Дамінік Рааб лічыць недапушчальным, каб беларускія ўлады працягвалі жорстка абыходзіцца з Раманам Пратасевічам. Так ён адрэагаваў на ўчорашнюю прэс-канферэнцыю з удзелам затрыманага блогера.
"Учорашняя пастановачная прэс-канферэнцыя, на якой Раман, відавочна, знаходзіўся пад ціскам, паказвае, што нападкі рэжыму Лукашэнкі на правы чалавека выйшлі на новы, яшчэ больш страшны, узровень", — напісаў ён у Твітары.
Рааб заклікаў афіцыйны Мінск вызваліць Пратасевіча і забяспечыць свабоду СМІ ў Беларусі.
Як распавядала Еўрарадыё, гэтую прэс-канферэнцыю 14 чэрвеня асудзіў і міністр замежных спраў Латвіі Эдгарс Рынкевічс. Па яго словах, яна "нагадвае горшыя прыклады сталінскай мінуўшчыны".
Belarus’ continued mistreatment of journalist Roman Protasevich is unacceptable. Yesterday’s staged media conference where Roman was clearly under duress marks a new low in the Lukashenko regime’s attack on human rights. Release Roman and #defendmediafreedom
— Dominic Raab (@DominicRaab) June 15, 2021
