FIAPF прыпыніў акрэдытацыю кінафестывалю "Лістапад"
Кінафестываль "Лістапад" пазбаўлены акрэдытацыі ў Міжнароднай федэрацыі асацыяцый кінапрадзюсараў, паведамляе тэлеграм-канал @by_culture. Раней з заклікам гэта зрабіць у FIAPF звярталіся прадстаўнікі беларускага дэмакратычнага руху, дзеячы культуры.
"Змены, прынятыя новай дырэкцыяй "Лістапада", могуць мець наступствы ў экасістэмах іншых фестываляў, акрэдытаваных FIAPF, — заявіў прэзідэнт федэрацыі Луіс Альберта Скалела. — Мы прыйшлі да высновы, што гэта парушае некаторыя важныя прынцыпы FIAPF і прынялі рашэнне прыпыніць акрэдытацыю "Лістапада" ў 2021 годзе".
Мяркуецца, што рашэнне Міжнароднай федэрацыі асацыяцый кінапрадзюсараў "маргіналізуе кінафестываль у вачах міжнароднай кінасупольнасці".
Штогадовы міжнародны кінафестываль "Лістапад” праводзіўся ў Мінску з 1994 года. Сёлета мерапрыемства арганізоўвае іншая дырэкцыя, зменены склад праграм і метад адбору фільмаў, прыдуманы новы слоган.
На відэа — гутарка ад верасня 2021-га ў эфіры Еўрарадыё пра "Лістапад" з кінакрытыкам Тарасам Тарналіцкім.
