Экс-журналіста БТ Дзмітрыя Лукшу асудзілі на 4 гады калоніі
Суд па "справе Дзмітрыя Лукшы" / sb.by
Яго жонцы прысудзілі 2,5 года.
Чатыры гады калоніі агульнага рэжыму прысудзілі экс-журналісту БТ (ён вёў "Зону Х") і пазаштатнаму карэспандэнту казахстанскага тэлеканала "Хабар 24" Дзмітрыю Лукшу, паведамляюць праваабаронцы "Вясны".
Працэс праходзіў у Мінскім гарадскім судзе. Справу разглядала суддзя Наталля Бугук.
Нагодай для абвінавачання Лукшы сталі відэасюжэты пра Беларусь, якія ён рабіў для казахстанскага тэлеканала.
Акрамя Лукшы на лаве падсудных апынуліся яго жонка і яшчэ два мужчыны. Іх вінавацілі ў "дыскрэдытацыі Беларусі", а таксама "актыўным удзеле ў групавых дзеяннях, якія груба парушаюць грамадскі парадак".
Акрамя зняволення Лукшу прысудзілі таксама выплаціць штраф у 16 тысяч рублёў (500 базавых велічыняў).
Яго жонка Паліна Палавінка асуджаная на 2,5 года калоніі агульнага рэжыму і штраф у памеры 3200 рублёў(100 базавых). Дзяніс Яроўскі правядзе 1,5 года ў калоніі агульнага рэжыму і заплаціць штраф у 100 базавых (3200 рублёў). А Канстанціну Ніканораву прысудзілі 3 гады "хатняй хіміі" і штраф у 100 базавых (3200 рублёў).
Лукшу і ягоную жонку праваабаронцы прызналі палітвязнямі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.