Дзяўчыну, якая расказала пра катаванні на Акрэсціна, асудзілі на "хатнюю хімію"

Дзяўчыну, якая расказала пра катаванні на Акрэсціна, асудзілі на "хатнюю хімію"

Тры гады "хатняй хіміі" прысудзілі палітзняволенай Аляксандры Патрасаевай, перадае Радыё "Свабода". Дзяўчыну прызналі вінаватай ва ўдзеле ў масавых беспарадках (арт. 342 Крымінальнага кодэкса).

Патрасаеву вызвалілі ў залі суда. Канфіскаваны ў яе бел-чырвона-белы сцяг суд пастанавіў зьнішчыць.

20-гадовую дзяўчыну затрымалі 16 кастрычніка 2020 года, з таго часу яна была за кратамі.

Дзяўчыну судзілі за падзеі 10 жніўня ў Мінску. Як сцвярджаў бок абвінавачання, Патрасаева 10 жніўня і ў наступныя дні "прымала актыўны ўдзел у масавых беспарадках, а таксама ў загадзя спланаваных групавых дзеяннях, якія груба парушаюць грамадскі парадак". Таксама сцвярджалася, быццам дзяўчына заклікала людзей да супраціву і аказвала непадпарадкаванне прадстаўнікам улады.

На судзе Аляксандра Патрасаева распавяла, як у тэлеграм-каналах прачытала, што людзям патрабуецца дапамога медыкаў, і паехала пасля працы, каб яе аказаць. На скрыжаванні вуліц Бяды, Багдановіча, Сурганава (раён гандлёвага цэнтра "Рыга") яна не бачыла міліцыянтаў і ніякіх патрабаванняў не чула. Бачыла, як людзі ставяць барыкады, але не было падпалаў, пагромаў ці кідання прадметаў.

Аляксандра распавяла, што аказвала людзям меддапамогу: апрацоўвала раны, давала абязбольвальныя. Адыходзіла ненадоўга, каб выкінуць мех са смеццем. Наконт металічнай палкі ў руках, пра якую заявіла абвінавачанне, дзяўчына сказала, што падняла яе з зямлі, каб выкінуць, і ніякіх фізічных дзеянняў з ёй не рабіла.

Першы раз Аляксандру схапілі ў ноч на 11 жніўня, і тры дні яна была ў ізалятары на Акрэсціна. Пасля выхаду адтуль дзяўчына распавяла пра перажытыя катаванні: біццё, знявагі, абразы, пагрозы згвалтаваць. Яе прымушалі распранацца, станавіцца на расцяжку і пры гэтым увесь час білі, прычым рабіла гэта жанчына. Калі Патрасаеву адпусцілі, у яе былі моцна траўмаваныя звязкі, лекары наклалі гіпс.

Следчы камітэт адмовіўся прыняць заяву Аляксандры Патрасаевай пра катаванні на Акрэсціна.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі