Дзетсад пад Бабруйскам, выхаванец якога памёр, не сталі закрываць на каранцін

А вось у Каменскім дзіцячым садзе ў Бабруйскім раёне, дзе займаўся памерлы 25 снежня пяцігадовы Данііл, каранціну няма. Пра гэта Еўрарадыё расказала выхавальніца дзіцяці Алена Міхайлаўна.

"Пакуль невядома прычына смерці, — кажа суразмоўніца Еўрарадыё. — Ніякіх вынікаў ні з санстанцыі, ніадкуль няма, таму ў нас няма падстаў аб'яўляць каранцін. У яго нічога заразнага не было. Думаю, калі б было заразнае, нам бы сказалі, каб мы закрыліся на каранцін. А пакуль ідзе следства".

Па словах выхавальніцы, хлопчыку стала дрэнна дома, дзе ён жыў з мамай і бабуляй. Раніцай ён быў у дзіцячым садзе: там праходзіў навагодні ранішнік. На свяце Данііл быў вясёлы і актыўны, расказваў вершы. Гэта бачылі і дзеці, і бацькі, і выхавальнікі.

Следчы камітэт у цяперашні час праводзіць праверку па факце смерці дзіцяці. Там лічаць, што дзіцячыя смерці ніяк не звязаныя.