Другі месяц запар у Беларусі фіксуюць дэфляцыю
Белстат заяўляе, што ў Беларусі другі месяц запар — дэфляцыя / pixabay.com, ілюстрацыйнае фота
У лістападзе ў Беларусі зафіксаваная дэфляцыя, паведамляе Нацыянальны статыстычны камітэт.
Спажывецкія цэны на тавары і паслугі ў мінулым месяцы знізіліся на 1,1% у параўнанні з кастрычнікам. Ад пачатку года цэны выраслі на 12,4%, а ў параўнанні з лістападам 2021-га — на 13,3%.
За сёлетні лістапад цэны на харчовыя тавары знізіліся на 0,6%, на нехарчовыя — на 2,2%. Цэны на паслугі ў мінулым месяцы паменшалі на 0,4%.
Паводле афіцыйных звестак, дэфляцыя ў Беларусі фіксуецца другі месяц запар. У кастрычніку цэны на тавары і паслугі знізіліся на 1% у параўнанні з вераснем.
