Давесці справу да Гаагі: Варшава расследуе збіццё польскіх журналістаў у Мінску

У Польшчы распачатае расследаванне па факце збіцця траіх палякаў у часе пратэстаў у Беларусі. Сведкамі выступаюць у тым ліку беларускія сілавікі. Адзін з пацярпелых, журналіст Вітольд Дабравольскі, расказаў Еўрарадыё падрабязнасці.

— Наша галоўная мэта — гэта давесці справу аб катаваннях разам з многімі іншымі ахвярамі да Міжнароднага суда ў Гаазе. Павінен прайсці трыбунал, каб людзі, адказныя за тое, што адбыўся гвалт, былі пакараныя, — расказвае Вітольд Дабравольскі.

Расследаваннем справы займаецца Агенцтва ўнутранай бяспекі Польшчы. Ужо ёсць сведчанні аб здзеках і катаваннях у дачыненні да Дабравольскага і яшчэ дваіх польскіх грамадзян.

— Я ведаю, што некаторыя з беларускіх сілавікоў ужо былі дапытаныя. Але дэталяў пра тое, хто гэта, я не маю. Дый не мог бы дзяліцца, пакуль ідзе расследаванне, — дадае журналіст.

Польскае выданне rmf24 піша, што следства імкнецца пахвілінна аднавіць падзеі, якія адбыліся з трыма грамадзянамі Польшчы ў Мінску. Але ў спецслужбаў ёсць сумненні наконт шчырасці некаторых прадстаўнікоў беларускіх сілавых структур. Яны асцерагаюцца, што, даючы паказанні, яны папраўдзе спрабуюць высветліць падрабязнасці ходу расследавання.

Адвакат Вітольда Томаш Віліньскі супрацоўнічае з праваабарончымі арганізацыямі і пацярпелымі з іншых краін і хацеў бы пашырыць судовы разбор. У планах — прадставіць дзеянні сілавікоў як дзейнасць арганізаванай узброенай злачыннай групы, у склад якой уваходзяць супрацоўнікі МУС, КДБ і АМАП, і даказаць факты прымянення катаванняў у дачыненні да мірнага насельніцтва.

Вітольд Дабравольскі прыехаў у Беларусь 6 жніўня, каб асвятляць прэзідэнцкія выбары. 10 жніўня яго разам з фатографам Касперам Сініцкім запіхалі ў чорны бус на Нямізе ў Мінску. Карэспандэнты выйшлі на свабоду толькі праз тры дні.

Па словах Вітольда, збіваць іх пачалі адразу — яшчэ ў мікрааўтобусе. Пасля гэтага — перасадзілі ў аўтазак і адвезлі ў РУУС Фрунзенскага раёна. Там збіццё і абразы працягнуліся.

— Нас адвялі ў нейкую баскетбольную залу. Там ужо было каля ста чалавек. Усім трэба было ляжаць галавой у падлогу. Людзі крычалі, іх працягвалі збіваць, — расказваў Еўрарадыё Вітольд. — Калі даведаліся, што я з Польшчы, збіваць сталі мацней. Яны адвялі нас з Касперам у калідор і сказалі, што ненавідзяць палякаў. Успаміналі гісторыю Другой сусветнай вайны. Тое ж самае было з латвійцамі, іх таксама называлі фашыстамі. Тое, што мы журналісты, ніяк нам не дапамагала.

Пасля гэтага Вітольда і Каспера перавезлі ў турму ў Жодзіне. Адтуль іх адпусцілі без суда, бо не знайшлі перакладчыка з польскай. Амбасада Польшчы перавезла пацярпелых журналістаў у бяспечнае месца і дапамагла вылецець у Варшаву.

У Польшчы Вітольда і Каспера з рознымі выцятымі месцамі паклалі ў бальніцу на абследаванне.

— Я быў і ва Украіне, і ў Ганконгу, і ў іншых гарачых кропках, але за апошнія гады я не бачыў нічога падобнага да таго, што адбывалася ў Беларусі. Каб вось так выкрадалі, катавалі журналістаў, арыштавалі за пару дзён 7000 чалавек! Сапраўднае вар'яцтва, — рэзюмуе Вітольд.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.