Да канца года Беларусь атрымае ад Расіі толькі $1 млрд
Да канца года Беларусь атрымае ад Расіі толькі $1 млрд з абяцанага крэдыту. Пра гэта заявіў міністр фінансаў РФ Антон Сілуанаў. Паводле яго слоў, 500 мільёнаў долараў — гэта грошы Еўразійскага фонду стабілізацыі і развіцця, яшчэ столькі ж — "за кошт міждзяржкрэдыту". 500 мільёнаў долараў (таксама "за кошт міждзяржкрэдыту") наша краіна атрымае ў 2021 годзе, паведамляе ТАСС. Цяпер умовы выдзялення крэдыту прапрацоўваюцца з Міністэрствам фінансаў Беларусі, заявіў Сілуанаў.
Пра крэдыт у памеры 1,5 млрд долараў Аляксандр Лукашэнка дамовіўся падчас сустрэчы ў Сочы ў Уладзімірам Пуціным. 16 верасня беларускі кіраўнік нагадаў, што сёлета Беларусь павінна была Расіі "мільярд... па старым нашым доўгу вярнуць". "Пры ўсіх складанасцях мы гатовы былі вярнуць гэты мільярд, — цытуе словы Лукашэнкі БЕЛТА. — ...Гэта была мая просьба да кіраўніцтва Расіі пра тое, што мы гэты мільярд у гэтым годзе вам не выплочваем, пакідаем у сябе і пераносім на будучы год".
"Працэнт там прымальны, — дадае Аляксандр Лукашэнка. — То бок, гэта пытанне рэфінансавання".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
