Ціханоўская расказала, якія праблемы абмяркоўвае на форуме ў Давосе

Святлана Ціханоўская / t.me/tsikhanouskaya
Святлана Ціханоўская / t.me/tsikhanouskaya

Святлана Ціханоўская распавяла, якія праблемы абмяркоўвае на міжнародным эканамічным форуме ў Давосе. Відэазварот з'явіўся ў тэлеграм-канале палітыка.

Падчас сустрэч і выступаў Ціханоўская тлумачыць, чаму трэба адрозніваць беларусаў ад рэжыму Лукашэнкі. Найперш — гэта стаўленне да расійскай агрэсіі супраць Украіны: "Гэта рэжым стаў суагрэсарам у вайне, а беларусы ёй супрацьстаяць".

Таксама на сустрэчах Ціханоўская абмяркоўвае тэму палітвязняў і прапаноўвае стварыць міжнародны фонд падтрымкі палітвязняў.

Уздымаецца і тэма міжнароднай кааліцыі ў падтрымку незалежнай і свабоднай Беларусі. На думку Ціханоўскай, гэтую ідэю падтрымаюць Польшча, Літва, краіны Еўрасаюза і ЗША. "Тут я выступіла з ініцыятывай распрацаваць комплексную стратэгію па Беларусі. Праблема не ў тым, што стратэгія па Беларусі дрэнная — яе проста няма. Дзеянні Захаду павінны быць паслядоўнымі і вырашаць праблемы, а не сімптомы. Праблема — гэта дыктатура Беларусі. Пакуль Лукашэнка ва ўладзе, рэпрэсіі будуць працягвацца, а Беларусь будзе пагрозай для свету", — кажа палітык.

Эканамічная каманда падрыхтавала прэзентацыю эканамічных рэформаў у Беларусі. Яе прадставяць на форуме ў чацвер, 19 студзеня. Інвестараў з усяго свету, кажа Ціханоўская, запросяць інвеставаць у будучую Беларусь.

Таксама яна папрасіла міжнародныя карпарацыі замаўляць рэкламу ў незалежных беларускіх СМІ, каб падтрымаць іх у стварэнні якаснай журналістыкі.

На думку Ціханоўскай, удзел у Давоскім форуме — добрая магчымасць вярнуць Беларусь на карту Еўропы. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі