Брэсцкія сілавікі змусілі ўкраінку змяніць на машыне герб Украіны на сцяг РБ
У Брэсце супрацоўнікам ГУБАЗіКа не спадабалася, што на машыне мясцовай жыхаркі была налепка ў выглядзе герба Украіны — трызуба. Яны прымусілі жанчыну замяніць гэтую налепку на дзяржаўны сцяг РБ. Справаздачу яны апублікавалі ў сваім рэгіянальным телеграм-канале.
Брастаўчанка Юлія паходзіць з Украіны. Апошня восем гадоў яна жыве ў Беларусі. Сілавікі здзекліва пракаментавалі, што яна мае добрую працу, але "вырашыла пашукаць экстрыму" і стала чытаць не тыя інтэрнэт-крыніцы і "рэпосціць экстрэмісцкія матэрыялы".
Таксама яны апублікавалі фота, як жанчына адклейвае са свайго Chrysler 300M чорна-белы Трызуб. На яго месцы з'явілася налепка з чырвона-зялёным сцягам.
Дарэчы, украінскі герб, як і ўкраінскі сцяг, у Беларусі не ўключаныя ў якія-небудзь спісы экстрэмісцкіх матэрыялаў.
