Беларусы ў Германіі: тут кожны можа хадзіць ці вывесіць з акна любы сцяг
Акцыя беларусаў у Берліне 29 снежня / Вераніка Круглова, фэйсбук
14 студзеня старшыня Савета Рэспублікі Наталля Качанава, гаворачы пра БЧБ-сімволіку, заявіла, што ў іншых краінах на неўстаноўленыя сцягі дзейнічае "жэстачайшая забарона". "Паспрабавалі б у Германіі вывешваць або выходзіць з імі", — сказала чыноўніца.
Еўрарадыё пагутарыла на гэту тэму з беларусамі на эміграцыі. Аказалася, што Наталля Іванаўна ўсё ж схітравала.
Вераніка Круглова, музыка і заснавальніца беларускага гурта KRIWI, жыве ў Берліне з 2004 года. Яна не раз арганізоўвала акцыі і ўдзельнічала ў пікетах у нямецкай сталіцы. Ніякіх праблем з сімволікай у спявачкі ніколі не ўзнікала.
— Ці ўзнікалі якія-небудзь пытанні да бел-чырвона-белых сцягоў у нямецкай паліцыі падчас вашых пікетаў?
— Любая сімволіка дазволеная ў Германіі, акрамя фашысцкай. Тут кожны можа хадзіць ці вывесіць з акна кватэры, машыны свой уласны сцяг, любой краіны або свой сямейны. Які пажадаеце! Падчас нашых зарэгістраваных акцый паліцыя нас ахоўвае, — адказвае Вераніка. — Зарэгістраваць акцыю не складана зусім, гэта можа зрабіць кожны. Адзіночны пікет можна не рэгістраваць.
З Веранікай згаджаецца Ганна з Брэмена. Беларусы выходзяць на пікеты ў яе горадзе амаль кожны тыдзень пачынаючы са жніўня. Да БЧБ-сцягоў пытанняў ні ў кога не было.
— Стыхійна гэта рабіць нельга, асабліва праз пандэмію каранавіруса. Таму кожны раз за дні чатыры трэба падаваць заяўку. Потым прыходзіць дазвол, з месцам правядзення і часам. Бо ёсць і іншыя акцыі, усё павінна рэгулявацца. Паліцыя кантралюе, каб паміж удзельнікамі вытрымлівалася неабходная дыстанцыя.
Сцягі — калі ласка. На вокнах і балконах у Брэмене можна ўбачыць БЧБ-сцягі. Тут гэта нармальна. Тут шмат замежнікаў, і кожны можа павесіць свой сцяг, або лозунг, або вясёлкавы сцяг.
Аналагічная сітуацыя з "неўстаноўленай сімволікай" у Швецыі, расказвае Еўрарадыё беларуска Аліна Янчур:
— Са сцягамі праблем няма, усім цікава нават. Тут і чылійцы, і кітайцы праводзілі акцыі, усе са сцягамі сваіх рухаў. Ні ў кога пытанняў не было.
Вось толькі тут трэба дазвол на масавыя мерапрыемствы. Мы былі аднойчы без дазволу, прыйшлі паліцэйскія, распытвалі, хто мы, і сказалі, каб без дазволу не прыходзілі. Гэта нібыта ў мэтах бяспекі. Калі на нас нападуць, напрыклад, нязгодныя з нашымі лозунгамі. Каб паліцыя была побач і магла нас абараніць.
У Іспаніі і зусім заяўку на правядзенне акцыі можна не падаваць, калі колькасць удзельнікаў мерапрыемства не будзе перавышаць 20 чалавек. Іспанка Анхела Эспіноса Руіз некалькі разоў удзельнічала ў пікетах у падтрымку беларусаў-пратэстоўцаў у Малазе.
–– Падчас акцый пытанні былі толькі аб тым, колькі нас будзе! Калі больш за 20 чалавек або марш будзе ісці па горадзе, трэба падаць заяўку загадзя, каб паліцыя нас абараняла. І праз вірус бывае па-рознаму, меры змяняюцца раз-пораз.
Наконт сцягоў паліцыя казала, што яны вельмі прыгожыя, харошыя колеры. І пажадала поспехаў у абароне правоў чалавека і дэмакратычных каштоўнасцяў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.