Беларускім школьнікам павялічаць колькасць урокаў рускай і беларускай

15/08/2022 - 15:10

Беларуская школа / 1prof.by

У 2022/2023 навучальным годзе беларускіх школьнікаў чакае шэраг зменаў у навучальнай праграме.

Напрыклад, на паўгадзіны на тыдзень павялічыцца колькасць гадзін на вывучэнне беларускай і рускай моваў у дзясятых і адзінаццатых класах. За навучальны год на іх цяпер адвядуць па 53 гадзіны замест 35.

Адначасова чыноўнікі змяншаюць колькасць гадзін на замежныя мовы, менавіта за кошт гэтага і ўдалося дадаць заняткаў па дзяржаўных.

Навучальныя праграмы па гісторыі Беларусі і грамадазнаўстве дапоўнілі інфармацыяй аб папраўках у Канстытуцыю, афіцыйна прынятых на рэферэндуме 27 лютага 2022 года.

Таксама з гэтага года школьнікі мусяць будуць ведаць менш геаграфічных назваў. Затое ў "дапрызыўную падрыхтоўку" дадалі нарматывы.

У рамках прадмета "Чалавек і свет" у чацвёртым класе, а пазней у вывучэнні "Гісторыі Беларусі" будзе больш увагі Вялікай Айчыннай і "генацыду беларускага народа". Таксама школьнікі будуць вывучаць закон "Аб генацыдзе беларускага народа".

"У 11-м класе ў навучальную праграму ўключаныя таксама пытанні пра злачынствы польскіх, украінскіх, літоўскіх і латышскіх нацыяналістаў супраць мірнага насельніцтва Беларусі, пра ўдзел беларускіх калабарацыяністаў у рэалізацыі акупацыйнай палітыкі германскіх нацыстаў на тэрыторыі нашай краіны", — паведамілі ў Нацыянальным інстытуце адукацыі.

Невялікія змены — і ў сістэме адзнак: станоўчымі цяпер будуць лічыцца адзнакі ад трох да дзесяці балаў, нездавальняючымі — адзінкі і двойкі.

"Навучэнец, які атрымаў 1 або 2 балы па прадмеце па выніках навучальнага года, будзе атрымліваць заданне на лета. У жніўні гэтага навучальнага года па раскладзе, зацверджаным кіраўніком установы адукацыі, ён павінен будзе прайсці атэстацыю па гэтым прадмеце. У выпадку, калі не будзе атрыманая станоўчая адзнака і ў жніўні, навучэнец застанецца на паўторны год навучання", — растлумачылі ў НДА.

Нездавальняючыя адзнакі па выніках года ў дзевяці- і адзінаццацікласнікаў могуць паўплываць на допуск да выпускных экзаменаў.