Вы тут

ААН пытаецца пра сітуацыю з затрыманымі праваабаронцамі і работнікамі СМІ

Сяргей Драздоўскі і Алег Граблеўскі / t.me/viasna96

Спецдакладчыкі ААН даслалі беларускім уладам ліст наконт таго, што ў Беларусі крыміналізуецца дзейнасць праваабаронцаў і работнікаў СМІ.

Як паведамляе праваабарончы сайт "Вясна", яго падпісалі спецдакладчык па пытанні аб становішчы праваабаронцаў, працоўная група па адвольных затрыманнях, спецдакладчык па сітуацыі з правамі чалавека ў Беларусі, спецдакладчык па правах людзей з інваліднасцю, спецдакладчык па пытанні аб заахвочванні і абароне права на свабоду перакананняў і іх свабоднае выказвання, спецдакладчык па пытанні аб правах на свабоду мірных сходаў і свабоду ўдзелу ў аб'яднаннях, спецдакладчык па пытанні аб незалежнасці суддзяў і адвакатаў, спецдакладчык па пытанні аб катаваннях і іншых жорсткіх, бесчалавечных ці прыніжаючых годнасць відах абыходжання і пакарання.

У прыватнасці, яны згадваюць справы юрыстаў Офіса па правах людзей з інваліднасцю Сяргея Драздоўскага і Алега Граблеўскага, "Прэс-клуба", праваабаронцаў "Вясны" Марыі Рабковай, Леаніда Судаленкі і Марыі Тарасенка, а таксама справу медыяменеджара Андрэя Аляксандрава.

"У выпадку з Сяргеем Драздоўскім і Алегам Граблеўскім мы глыбока занепакоеныя меркаваным жорсткім абыходжаннем з імі падчас допыту пад ілжывай падставай супрацоўнікамі Дэпартамента фінансавых расследаванняў. Мы асцерагаемся, што іх крымінальны пераслед і меркаванае жорсткае абыходжанне можа быць рэакцыяй на іх супрацоўніцтва з Арганізацыяй Аб'яднаных Нацый у галіне правоў чалавека. Мы таксама занепакоеныя адсутнасцю разумных умоў утрымання, прадастаўленых Сяргею Драздоўскаму, які карыстаецца інвалідным вазком, падчас яго сямігадзіннага допыту, а таксама паведамленнямі пра тое, што Алега Граблеўскага прымусілі зняць адзенне падчас допыту. Акрамя таго, мы занепакоеныя новымі абвінавачваннямі, выстаўленымі супраць Марыі Рабковай, якія, па ўсёй бачнасці, з'яўляюцца наступствам яе ўдзелу ў ініцыятывах грамадзянскай супольнасці і законнага ажыццяўлення яе права на свабоду меркаванняў і іх свабоднага выказвання", — гаворыцца ў звароце.

Непакой у спецдакладчыкаў выклікае вялікая колькасць выпадкаў, калі з людзей бяруць падпіску аб неразгалошванні інфармацыі. На іх думку, гэта абмяжоўвае свабоду выказвання меркаванняў і законную працу праваабаронцаў, журналістаў і работнікаў СМІ. 

Спецдакладчыкі ААН просяць беларускі ўрад даць любую дадатковую інфармацыю або каментары па згаданых крымінальных справах. Яны хочуць азнаёміцца з юрыдычнымі і фактычнымі падставамі крымінальных спраў усіх згаданых вышэй праваабаронцаў і работнікаў медыясферы. Таксама прадстаўнікі ААН хочуць даведацца пра меры, якія беларускія ўлады прымаюць таго, каб усе людзі, у тым ліку з інваліднасцю, маглі ў поўнай меры ажыццяўляць і абараняць свае правы. Яны просяць патлумачыць, чаму затрыманыя Леанід Судаленка, Юлія Слуцкая, Сяргей Альшэўскі, Ала Шарко, Сяргей Якупаў, Пётр Слуцкі, Сяргей Драздоўскі і Алег Граблеўскі не мелі доступу да сваіх адвакатаў падчас допыту. 

Акрамя таго спецдакладчыкі ААН просяць паказаць "меры, прынятыя для прадухілення запалохванняў або рэпрэсій".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.